អូស្រ្តាលី៖ អាជ្ញាធរបានប្រាប់ឱ្យដឹងនៅថ្ងៃអង្គារនេះថា មានមនុស្ស ៦នាក់បានបាត់បង់ជីវិត ក្នុងនោះរួមមាន២នាក់ជាប៉ូលីស ក្នុងហេតុការណ៍បាញ់ប្រហារមួយនៅតំបន់ជនបទ ក្នុងរដ្ឋ Queensland។ ដំណឹងនេះត្រូវបានឱ្យដឹងក្រោយការចុះទៅដល់ទីតាំងកើតហេតុ ដើម្បីពិនិត្យ និងស៊ើបអង្កេតពីមនុស្សដែលបាត់ខ្លួន។ 

នៅក្នុងសេចក្តីថ្លែងការណ៍មួយដែលប៉ូលីសបានឱ្យដឹងថា ព័ត៌មានបឋមគឺមានមន្រ្តីអាជ្ញាធរត្រូវបានជនដៃដល់ប្រដាប់អាវុធចំនួន ២នាក់បានបាញ់ប្រហារកាលពីល្ងាចថ្ងៃចន្ទ នៅពេលដែលពួកគេបានចូលទៅដល់លំនៅដ្ឋានមួយកន្លែងស្ថិតនៅតំបន់ Wieambiilla ដែលមានចម្ងាយប្រហែល ៣០០គីឡូម៉ែត្រភាគពាយព្យនៃទីក្រុង Brisbane រដ្ឋ Queensland។

អាជ្ញាធរបានបន្ថែមថា មានមនុស្យស ៣នាក់ផ្សេងទៀតដែលក្នុងនោះមានម្នាក់ជាស្រ្តីត្រូវបានបាញ់សម្លាប់ បន្ទាប់​ពី​មន្ត្រី​ជំនាញ ​និងមាន​ជំនួយផ្នែក​អាកាស​បាន​ឆ្លើយ​តប​នឹង​ស្ថានភាព​ឡោមព័ទ្ធទៅលើលំនៅដ្ឋានឯកជនមួយកន្លែង។ ដោយឡែក មានមនុស្សម្នាក់ផ្សេងទៀតត្រូវបានស្លាប់ ខណៈមន្រ្តីប៉ូលិស ២នាក់ក៏បានបញ្ជូនទៅកាន់មន្ទីរពេទ្យភ្លាមៗដែរ ប៉ុន្តែស្ថិតក្នុងស្ថានភាពមិនធ្ងន់ធ្ងរប៉ះពាល់អាយុជីវិតឡើយ។ 

នាយករដ្ឋមន្រ្តីអូស្ត្រាលី លោក Anthony Albanese បានហៅហេតុការណ៍នោះថាជា "ថ្ងៃដ៏ក្រៀមក្រំ និងសោកសៅបំផុតសម្រាប់ក្រុមគ្រួសារ និងមិត្តភ័ក្តិរបស់មន្ត្រីប៉ូលីស Queensland ដែលបានបាត់បង់ជីវិតក្នុងជួរបំពេញកាតព្វកិច្ច"។ ក្នុង Twitter ផ្ទាល់ខ្លួន លោក Albanese បានសម្តែងនូវមរណទុក្ខចំពោះមន្រ្តីដែលបានពលីជីវិតក្នុងហេតុការណ៍៍អកុសលនេះ៕